အိမ်

လူတစ်ယောက်အတွက် အိမ်ဆိုတာ သူ့ဘ၀ ရှိတဲ့ နေရာလား? သူ့အမေ ရှိတဲ့ နေရာလား?

ငယ်ငယ်ကတည်းက မိဘ နဲ့ ဝေးကွာတဲ့ အရပ်မှာ ကြီးပြင်းခဲ့သူမို့ အိမ် ဆိုတာဟာ လွမ်းစရာ တစ်ခုပါ။
ကျောင်းနေစဉ် ကျောင်းသားဘ၀ မှာတော့ ရန်ကုန်မှာ ကျောင်းပိတ်ရင် တောင်ပေါ်မြို့လေးက အိမ်ကို နွေရာသီရောက်တိုင်း အပျော်တွေ နဲ့ ပွေ့ဖက်လို့ အမေရှိရာ အိမ်ကို ပြန်ဖြစ်တယ်။ အမေ နဲ့ အိမ်ကို ခွာလာပြီးတော့ အမေကိုလွမ်းတဲ့ စိတ်လား၊ အိမ်ကိုလွမ်းတဲ့စိတ်လား၊ အမေ နဲ့ အိမ်ကို လွမ်းတဲ့ စိတ်လား တော့ မသိဘူး။ အိမ် ကို လွမ်းနေတတ်တယ်။ ကိုယ့်ဘ၀ အတွက် ကိုယ်ပိုင် အိမ်လေးတစ်လုံးကို မပိုင်ဆိုင်သေးတာရယ်၊ ကိုယ်ပိုင်အိမ်လေးထဲ မှာ ကိုယ့်ချစ်သူ နဲ့ တူတူ နေခွင့်မရှိသေးတာရယ်ကြောင့် အခုအချိန်မှာ ကိုယ့်အတွက် အိမ် ဆိုတာ အမေ ရှိတဲ့ အိမ် လို့ပဲ သတ်မှတ်လို့ ရသေးတယ်လေ။

ဒါပေမယ့် ငယ်ငယ်က အမေ ကို ချစ်ပေမယ့် တက္ကသိုလ်တက်တဲ့ အရွယ်မှာ အမေနဲ့ သဘောထား မတိုက်ဆိုင်တာတွေ များလွန်းလို့ ထူးအိမ်သင် ရဲ့ အမေ့အိမ် ထက် ဇော်ဝင်းထွဋ် ရဲ့ အိမ် ကို ပိုပြီးနှစ်သက်တတ်ခဲ့တယ်။ ဒီသီချင်းလေးကို ဆိုဖြစ်ခဲ့တယ်။ သီချင်းလေးထဲကလို အိမ်အပြန် ဆီးကြိုတတ်မဲ့ ချစ်သူကို နှစ်ပေါင်းများစွာ မျှော်လင့်ရှာဖွေနေခဲ့မိတယ်။

သြော် အိမ်ကလေး တစ်လုံးပါကွယ်..